Paulunê papia gêdêŋ PILEMON

Pilemon tonaŋ gôlôac Kolosoŋa nêŋ ŋac towae teŋ eŋ. Onesiminê ŋatau eŋ. Koleŋwaga gêŋôma tonaŋ gêbôm aŋga nê ŋataunê. Gêdêŋ ŋasawa teŋ eŋ jagêô lasê gêdêŋ Paulu, taŋ gêŋgôŋ kapoacwalô naŋ. Onesimi gêŋô mêtê gêwiŋ e gêjam tau ôkwi ma gêliŋ saŋgu.

“Paulunê papia gêdêŋ Pilemon” nec eŋ keteŋ ŋac tau gebe taê walô nê koleŋwaga aŋga gêŋômanêŋ, taŋ Paulu kêsakiŋ eŋ gêmu gêdêŋ nê ŋatau gêja kêtiam. Eŋ gebe Pilemon êkôc nê sakiŋwaga sa amboac gêŋômageŋ atom, êkôc eŋ sa êtôm lasi buŋa teŋ, taŋ eŋ kêsuc ênê biŋ ôkwigac naŋ.

Ŋadênaŋ

• 1. Paulu gêjac m nê papia 1-3
• 2. Paulu kêlanem Pilemon 4-7
• 3. Paulu gêjam neneŋ kêtu Onesimiŋa 8-22
• 4. Paulu gêjac mata papia tau 23-25

Philemon

Paulu gêjac m nê papia

1Kilisi Jesu nê ŋac kapoacwalôŋa aê, Paulu, agêc Timote ma biŋ êndêŋ aêacma ŋac Pilemon, taŋ gêjam kôm gêwiŋ aêac naŋ, 2agêc lasiŋio Apia ma Arkipi, taŋ gêjac siŋ gêwiŋ aêac gêmoa naŋ, ma êndêŋ gôlôac dabuŋ, taŋ sêŋgôŋ nêm andu naŋ.

3Tameŋi Anôtô agêc Apômtau Jesu Kilisi nêŋ moasiŋ to biŋmalô êndêŋ amac êwac.

Pilemonnê têtac gêwiŋ to kêkêŋ gêwiŋ ŋabiŋ

4Aê taêc gêjam aôm kêsêp ŋoc mec ŋalêlôm ma gajam daŋge ŋoc Anôtô ŋapaŋ, 5gebe gaŋô ŋawae gebe aôm têmtac gêwiŋ to kôkêŋ gêwiŋ Apômtau Jesu to têmtac gêwiŋ Anôtônê lau samob. 6Aê kateŋ mec gebe takêŋ gêwiŋ êmbiŋ aêac tôŋ e êkêŋ aôm ôjala gêŋ ŋajam samob, taŋ tatap sa aŋga Kilisinê naŋ. 7O lasicenec, aôm têmtac gêwiŋ lau gêgôm aê têtac ŋajam kêsa ŋanô to gêgôm aê gamoa totêtac malôgeŋ. Aôm kôlau Anôtônê launêŋ ŋalêlôm tekweŋ saki kêsa.

Paulu kêmasaŋ Onesiminê biŋ

8Amboac tonaŋ aê katôm gebe jajatu kôm, taŋ gêjac aôm ŋawae gebe ôŋgômŋa naŋ, êndêŋ aôm totêtac êpa sugeŋ êtu Kilisiŋa. 9Mago gabe jaŋgôm atom. Aê, Paulu, taŋ katu ŋac laŋgwa sugac ma galoc katu Kilisi Jesu nê ŋac kapoacwalôŋa gêwiŋ naŋ, kajatu aôm atom, kateŋ aôm kêtu têntac gêwiŋ tauŋŋa. 10Aê tec kateŋ aôm kêtu ŋoc latuc Onesimiŋa. Aê gaŋgôŋ kapoacwalô ma kadôŋ mêtê gêdêŋ eŋ e kêkêŋ gêwiŋ, tec galic eŋ kêtôm ŋoc latuc, taŋ kêka eŋ lasê naŋ. 11Gêmuŋgeŋ eŋ gêjam kôm gêjam aôm sa atom, mago galoc tec kêtôm gebe ênam aêagêc lulugeŋ sa.

12Aê jasakaiŋ eŋ toŋoc ŋalêlôm samucgeŋ êndêŋ aôm êmu êwac. 13Aê gabe jakôc eŋ tôŋ gebe ênam sakiŋ aê, taŋ gêŋgôŋ kapoacwalô kêtu ŋawae ŋajamŋa naŋ, êjô aôm su. 14Mago taêc gêjam teŋ gebe jaŋgôm atom, aôm taôm ôlôc acgom. Aê gabe jakac aôm gebe ôŋgôm gêŋ ŋajamŋa nec atom. Taôm nêm ŋalêlôm êkac aôm acgom, go êtôm.

15Onesimi gêmoa jaêc aôm ŋasawa dambê tonaŋ, oc moae ŋam gebe êmoa êwiŋ aôm endeŋ tôŋgeŋ. 16Eŋ êmoa êwiŋ aôm amboac gêŋômageŋ êtiam atom, masi, êlêlêc gêŋôma su. Têmtac êwiŋ eŋ amboac lasim. Aê galic eŋ amboac tauc lasic eŋ amboac tonaŋ, ma aôm têmtac êwiŋ eŋ amboac lasim êlêlêc aê su gebe eŋ kêtu aômnêm gôlôacnêŋ teŋ to kêtu aôm lasim kêtu Apômtauŋa.

17Amboac tonaŋ embe ôlic aê amboac nêm ŋac, naŋ ôkôc eŋ sa êtôm ôkôc aê tauc sa. 18Embe eŋ êŋgôm aômnêm gêŋ teŋ êtu sec, me ênac aômnêm tôp teŋ atom, naŋ ôkêŋ aê jawê kaiŋ tôp tau jajô eŋ su. 19Aê, Paulu, tauc lemoc kato biŋ tonec gebe “Aê oc janac ênê tôp.” Aê gabe jasôm biŋ ŋoc tôp gêc aômŋa nec atom. Tôp tau aôm taôm. 20O lasic, biŋŋanô, ômoasiŋ aê ŋagec êtu Apômtauŋa to ôlau ŋoc ŋalêlôm êtu Kilisiŋa acgom.

21Aê taêc kêka gebe aôm oc taŋam wamu biŋ, tec kato gêdêŋ aôm nec, ma kajalagac gebe aôm oc ôŋgôm êlêlêc aêŋoc biŋ tonaŋ su. 22Ma jasôm teŋ êwiŋ gebe Ômansaŋ aêŋoc balêm teŋ kwanaŋgeŋ gebe aê kakêŋ matoc gebe Anôtô êkêŋ aê jamu jandêŋ amac jawac êtu nêm mecŋa.

Paulu awa gêjac lau ŋamuŋa

23Epapra taŋ gêŋgôŋ kapoacwalô gêwiŋ aê kêtu Kilisi Jesuŋa naŋ, awa gêjac aôm. 24Ma Marka agêc Aristarka ma Dema agêc Luka, tec sêjam kôm sêwiŋ aê nec, aweŋ gêjac amac amboac tonaŋgeŋ.

25Apômtau Jesu Kilisi nê moasiŋ êwiŋ amac.